Tveir fulltrúar úr 7. bekk í Kerhólsskóla tóku þátt í Stóru upplestrarkeppninni á mánudaginn var við hátíðlega athöfn sem Skólaþjónusta Árnesþings stóð fyrir. Þar komu einnig saman nemendur frá Bláskógaskóla á Laugarvatni, Flóaskóla, Flúðaskóla, Reykholtsskóla og Þjórsárskóla.

Árangur nemenda Kerhólsskóla var einstaklega góður, en bæði komust þau á verðlaunapall. 

Þorbjörg Ásta Hallbjarnardóttir hafnaði í þriðja sæti og Hilmir Dreki Guðmundsson hreppti fyrsta sætið og stóð uppi sem sigurvegari keppninnar.

Í dómnefnd sátu Katrín Rut Sigurgeirsdóttir íslenskukennari við Fjölbrautaskóla Suðurlands, Guðbjörg Arnardóttir sóknarprestur í Árborg og Anna Stefanía Vignisdóttir talmeinafræðingur.

Þess má líka geta að Harpa Jakobsdóttir, nemandi í 8. bekk í Kerhólsskóla og sigurvegari keppninnar í fyrra, flutti texta og ljóð fyrir gesti við athöfnina.

Við erum mjög hreykin af öllum flottu krökkunum okkar hér í Kerhólsskóla og framtíðin er sannarlega björt.