Umhverfis- og hjóladagurinn

Umhverfis- og hjóladagurinn var haldinn í Kerhólsskóla miðvikudaginn 13. maí síðast liðinn.

Mikil gleði og dugnaður einkenndi daginn þar sem nemendur og starfsfólk sameinuðust í útivist, umhverfisvernd og hreyfingu.

Fyrri hluti dagsins var tileinkaður umhverfisvinnu. Nemendur á yngsta stigi tóku til hendinni við að tína rusl og sópa nærumhverfi skólans, á meðan nemendur á mið- og unglingastigi sinntu kurlun og grisjun á skólalóðinni og í nágrenni hennar. Þar lögðu allir sitt af mörkum til að fegra og bæta umhverfið. Eftir frímínútur voru hjólin dregin fram og tók þá við skemmtileg hreyfing utandyra. Nemendur á mið- og unglingastigi fóru ýmist í hjólatúr eða göngutúr um nærsvæðið. Yngstu nemendurnir hjóluðu við skólann og um nýju göturnar móts við skólann við mikinn fögnuð.

Eftir hádegi fóru allir saman í sund þar sem nemendur nutu þess að slaka á og leika sér eftir fjölbreytta og hressandi útiveru.

Dagurinn tókst afar vel og sýndi mikilvægi samveru, hreyfingar og umhyggju fyrir umhverfinu.

Meðfylgjandi er myndasería frá deginum.