Í haust fékk Kerhólsskóli styrk frá Krónunni til kaupa á svokölluðu Bambahúsi, gróðurhúsi sem ætlað er að efla kennslu og áhuga nemenda á ræktun og náttúruvísindum. Í vetur barst skólanum síðan húsið sjálft að gjöf og nú er loksins hægt að hefja notkun þess af fullum krafti.
Nemendur í 1. og 2. bekk hafa þegar tekið virkan þátt í verkefninu. Þeir hafa sáð fræjum og fylgst grannt með vexti plantnanna sem hafa dafnað vel dag frá degi. Verkefnið hefur vakið mikinn áhuga meðal barnanna sem fá þar tækifæri til að kynnast ferli ræktunar af eigin raun. Nýverið var ákveðið að taka plönturnar út til að herða þær fyrir íslenskar aðstæður. Þær fengu að njóta sólskinsins, fengu smá lögg og virtust almennt voða ánægðar með útiveruna. Þó komu fram smávægileg merki um aðlögunarörðugleika hjá agúrkuplöntunum sem voru nokkuð niðurlútar daginn eftir.
