Kerhólsskóli í Grímsnes- og Grafningshreppi varð til við sameiningu leikskólans Kátuborgar og Grunnskólans Ljósuborgar 1. janúar 2011. Í leikskóladeildinni eru nemendur frá 12 mánaða aldri og í grunnskóladeildinni eru nemendur í 1.-8. bekk.
Grunnskólinn Ljósaborg var vígður haustið 2005 í nýrri skólabyggingu á Borg og var fyrstu tvö skólaárin rekinn í samstarfi við Bláskógabyggð. Haustið 2007 lauk því samstarfi og hefur Grímsnes- og Grafningshreppur rekið skólana sína frá þeim tíma.
Eldri grunnskólanemendur í Grímsnes- og Grafningshreppi sækja Grunnskóla Bláskógabyggðar í Reykholti í Biskupstungum.
Fram til vorsins 2009 sóttu nemendur úr Þingvallasveit skólann. Áður fór grunnskólastarf hreppanna fram á Ljósafossi en þar hafði verið skóli frá því um miðjan fimmta áratug síðustu aldar.
Kerhólsskóli vinnur í anda einstaklingsmiðaðra kennsluhátta, umhverfismenntar auk þess sem áhersla er lögð á list og verkgreinar.
Samkennsla og samvinna árganga er ríkjandi og áhersla er lögð á teymisvinnu kennara.
Borg, 10. nóvember 2011,
Hilmar Björgvinsson skólastjóri