Fyrirkomulag
Í 1. – 4. árgangi eru 16 nemendur. Í íþróttum er nemendahópurinn allur saman. Í sundi eru 1. og 2. bekkur saman annars vegar og 3. og 4. bekkur hins vegar. Í kennslustundum sem kallast smiðjur er 1. og 3. bekk kennt saman og 2. og 4. bekk kennt saman. Í smiðjum eru kenndar námsgreinarnar textílmennt og smíði. Heimilisfræði er kennd á móti bekkjartímum og er þar sama skipting á nemendahópi eins og í smiðjum. 1. og 3. bekkur verður í heimilisfræði eftir áramót en 2. og 4. bekkur fyrir áramót. Myndmennt er kennd á móti bekkjartímum og hópaskipting sú sama og í heimilisfræði. Sérkennari starfar með umsjónarkennurum og fær nemendur til sín í sérkennslustofu. Við gerð stundaskrár er tekið mið af viðmiðunarstundaskrá yngsta stigs sem sett er fram í Aðalnámsskrá grunnskóla.
Áhersluþættir
Áhersla er lögð á að nemendur læri að vinna sjálfstætt og veita hjálparhönd þeim samnemendum sem þurfa. Mikið er unnið með samkennd og samvinnu, hlustun og framkomu og góða umgengni í skólanum. Umhverfismennt og náttúru upplifun skipar stóran sess. Nemendum er kennt að flokka sorp og útinám er á stundatöflu einu sinni í viku, 80 mín. í senn. Þess utan er farið út þegar færi gefst og námsmarkmið bjóða upp á. Heimavinna er einu sinni í viku í stærðfræði og íslensku og mikil áhersla er lögð á heimalestur, 5 sinnum í viku.
Kennsluhættir og vinnulag
Kennsluhættir eru fjölbreyttir. Samþætting námsgreina, útinám, stöðvavinna, þemavinna, s.s. eins og ,,söguaðferðin“, innlagnir, hópvinna og sjálfsnám nemenda eru dæmi um þær aðferðir sem helst er beitt. Gagnvirkur lestur, samlestur og lestrarstundir eru notaðar til að þjálfa lesturinn sem svo margt annað nám byggir á. Nemendur skila m.a. af sér verkefnum í formi veggspjalda, hugarkorta, bæklinga, teikninga, leirmynda og annarra skúlptúra úr mismunandi efnum. Þeir flytja einnig efni munnlega, bæði með söng, upplestri og leikritum.
Sem þátt í að efla sjálfstæði nemenda í námi og vinnubrögðum þá áforma þeir í viku hverri, ákveðinn hluta vinnu sinnar í íslensku, skrift og stærðfræði. Þeir setja sér markmið varðandi vinnubrögð og viðfangsefni í samráði við kennara. Á áformsblaði er einnig skráð viðfangsefni og markmið í átthagafræði (samfélagsfræði, náttúrufræði og umhverfismennt, trúarbragðafræði og lífsleikni).
Heimanám er unnið nánast í hverri viku og skila nemendur því á föstudögum og fá þá afhent nýtt heimanám. Nemendur meta sjálfir hvernig þeim gekk að vinna heimanámið og skrá hjá sér skilin, hvort sem þeir skila á réttum tíma eða seinna. Nemendur fá umsögn þar um við hver annaskil. Heimalestur er ákaflega mikilvægur þáttur í skólastarfinu og lögð rík áhersla á að nemendur lesi heima fimm sinnum í viku. Sbr. Lestrarstefna Kerhólsskóla.
Námsmat
Við námsmat er lögð áhersla í fjölbreytni í matsþáttum. Fylgst er með daglegu starfi nemenda og metnir þættir eins og t.a.m. samvinna, virkni, viðhorf, vinnubrögð, umgengni, færni, kunnátta og leikni sem teknir eru saman í formi leiðsagnarmats. Einnig fer fram sjálfsmat og jafningjamat. Í sumum greinum eru ferilmöppur og kannanir notaðar til að greina námsframvindu eða kanna hvaða námsmarkmiðum nemandi hefur náð. Við annaskil er tekið saman það sem metið hefur verið yfir önnina og það nýtt til að gefa nemendum og foreldrum yfirlit yfir stöðu og námsframvindu nemandans
Umsjónakennarar
Alice Petersen og Ragna Björnsdótti
Sjá nánar námsgreinahluta skólanámskrár Kerhólsskóla – 2011-2012