Fyrirkomulag
Nemendur 5. og 6. bekkjar eru 15 talsins með aðsetur í Gilinu. Hópurinn er saman í öllum tímum nema ensku og dönsku með einn kennara en sérkennari kemur að málum alls 3-4 kennslustundir í viku. Stundaskrá bekkjanna tekur mið af tímafjölda viðmiðunarstundaskrár í hverri námsgrein, fyrir 5. og 6. árgang. Námsefni er að stærstum hluta fengið í úthlutun frá Námsgagnastofnun en auk þess er fengið ítarefni af Vefnum og víðar. Val viðfangsefna og nálgun þeirra fer eftir þörfum hópsins.
Áhersluþættir
Fyrir utan hefðbundnar áherslur í ákveðnum námsgreinum, samkvæmt Aðalnámskrá grunnskóla, eru sérstakar áherslur lagðar á einstaklingsnám annars vegar og samvinnunám hins vegar og að nemendur haldi vel utan um öll sín gögn, taki ábyrgð á eigin námi og standi skil á sínu.
Kennsluhættir og vinnulag
Kennsluhættir eru fjölbreyttir. Innlögn frá kennara, sjálfsnám og þemavinna. Áhersla verður lögð á að nemendur nái að vinna í blönduðum hópum þar sem framlag hvers og eins skiptir máli. Aðferðin, Einn, fleiri, allir er dæmi um aðferðir sem beitt er.
Heimanámið kemur í grænu og bláu möppunum sem inniheldur áætlun, ýmist gerð af nemendum í samráði við kennara eða eingöngu af kennara. Skil á heimanámi er skráð hjá kennara.
Námsmat
Við námsmat er lögð áhersla á fjölbreytni. Símat, jafningjamat, ferilmöppur, kannanir og próf og leiðsagnarmat,eru dæmi um matsaðferðir sem beitt verður í vetur. Við annaskil er tekið saman það sem metið hefur verið yfir önnina og það nýtt til að gefa foreldrum innsýn í stöðu nemandans. Niðurstöður námsmats eru nýttar til leiðsagnar í náminu og eru fyrst og fremst í formi umsagna en einkunnir eru notaðar þar sem þær eiga betur við. Námsmatið skal endurspegla kennsluhætti og í þeim er ávallt litið til náms og félagslegra markmiða skólans
Umsjónarkennarar
Alice Petersen 5. bekkur
Þórunn Ingvadóttir 6. bekkur
Sjá nánar námsgreinahluta skólanámskrár Kerhólsskóla 2011-2012