Lög Nemendafélags Kerhólsskóla
1. Almenn atriði.
Nafn félagsins er Nemendafélag Kerhólsskóla, skammtstafað NFK.
Markmið félagsins eru að;
– sjá um og skipuleggja félagslíf nemenda í Kerhólsskóla.
– gæta hagsmuna nemenda skólans með því m.a. með því að koma á framfæri óskum og tillögum nemenda við skólastjóra, kennara eða þá sem málið varðar.
Aðsetur félagsins er í Kerhólsskóla, Grímsnes og Grafningshreppi.
Lög þessi skulu endurskoðuð árlega af umsjónarmanni félagslífs og stjórn NFK og staðfest af skólastjóra.
2.Stjórn NFK
Í stjórn eiga sæti 2 fulltrúar úr 8. bekk, 2 úr 7. bekk og 1 úr 6. bekk.
Aðalstjórn skiptir með sér verkum, öðrum en þeim sem kosin eru beinni kosningu, á fyrsta fundi nýrrar stjórnar. Formaður er sá sem hlýtur flest atkvæði í kosningu til stjórnar og varaformaður er sá sem hlýtur næstflest atkvæði. Kynjahlutfall skal vera sem jafnast (3 og 2 af hvoru kyni) og til að tryggja það eru þau tvö sem hljóta flest atkvæði af hvoru kyni valin til setu, nema í 6. bekk þar ræður atkvæðafjöldi.
Stjórn hefur ákvörðunar- og framkvæmdavald í öllum almennum málum NFK. Stjórn ber ábyrgð á öllum fjármálum NFK og skulu reikningar félagsins lagðir fram til endurskoðunar er skólaári lýkur eða eigi síðar en 1. júlí.
Skólastjóri eða fulltrúi hans endurskoða reikninga NFK.
Aðalstjórn NFK er bundin af lögum og reglum sem gilda um skólastarf og skólanámskrá skólans. Einnig formlegum samþykktum nemendafunda sem boðaðir eru 1 – 2 sinnum á vetri.
Kerhólsskóli ræður umsjónamann félagslífs, stjórn NFK til aðstoðar og ráðgjafar.
Formaður NFK eða staðgengill hans á rétt á setu á almennum kennarafundum. Hann skal þó víkja af fundi sé rætt um einstaka nemendur eða önnur trúnaðarmál.
3. Starfsemi.
Stjórn NFK fundar a.m.k. 2 sinnum í mánuði.
Formaður stjórnar fundi en getur valið staðgengil sinn ef svo ber undir.
Stjórn skal boða til almennra nemendafunda á skólaárinu til að auka almenna þátttöku nemenda í félagsstarfinu. Þetta skal gert fyrir einstaka aldurshópa eða allan skólann a.m.k. einu sinni í mánuði. Nemendafundir þessir geta verið í formi bekkjarfunda, almennra málfunda, kvöldvaka eða annarra skemmtana, jafnvel á skólatíma s.s. eins og þemadaga í klæðnaði.
Á nemendafundum gilda almenn fundarsköp eftir því sem við verður komið. Komi til atkvæðagreiðslu ræður einfaldur meirihluti greiddra atkvæða. Á nemendafundum hafa nemendur Kerhólsskóla einir atkvæðisrétt og hefur hver nemandi eitt atkvæði. Nemendafundur skal boðaður með minnsta kosti sólarhrings fyrirvara og umræðuefni kynnt á auglýsingatöflu skólans.
Stjórn skal reglulega senda út fréttir af starfsemi félagsins til félaga t.d. með fréttabréfi, tölvupósti, fréttum á heimasíðu eða í gegnum kjörna fulltrúa NFK í hverjum bekk.
Stjórn getur falið öðrum nemendum utan stjórnar ákv. verkefni s.s. að vera diskarar, formenn klúbba eða umsjónarmenn einstakra verkefna á vegum félagsins eða sjá um útgáfu skólablaðsins Snarfara.
Stjórn getur einnig falið bekkjarráðum ákv. stór verkefni í samráði við umsjónarmann félagslífs t.d. umsjón ýmissa viðburða sem NFK skipuleggur.
Stjórn NFK hefur í samstarfi við umsjónarmann félagslífs umsjón með öllu félagsstarfi nema bekkjarkvöldum.
Aðalstjórn NFK hefur samstarf um skipulag félagsstarfs við Nemendafélag Grunnskóla Bláskógabyggðar með því að hafa samband og kynna hugmyndir að dagskrá vetrarins.
4. Kosningar.
Í upphafi hvers skólaárs skal kosið í Kerhólsskóla.
Kjörgengir eru nemendur 6. – 8. bekkjar.
Stjórn nemendafélagsins kýs 2 fulltrúa í skólaráð til tveggja ára. Árlega er kosinn fulltrúi úr 7. árgangi þannig að fulltrúar nemenda í skólaráði skulu vera einn úr 8. árgangi og einn úr 7. árgangi.
Allir nemendur þessara árganga eru kjörgengir. Reglur um kosningar setur umsjónarmaður félagslífs og skólastjóri í samráði við stjórn NFL.