Ýmislegt hefur verið um að vera í vikunni hjá okkur í leikskóladeildinni eins og venjulega. Við höfum verið dugleg við að vera úti og farið í tvær gönguferðir um Borgarsvæðið. Í annarri göngunni prufukeyrðum við vagninn sem við vorum að eignast, og keyrðum börnin í honum til skiptis niður að grunnskóladeild þar sem við lékum okkur frjálst í leiktækjunum og á sparkvellinum. Vegasöltin voru mjög vinsæl í þeirri ferð. Aðeins varðandi vagnana en keyptir voru tveir fínir vagnar fyrir skólann í vikunni. Annan fáum við í leikskóladeildinni að hafa til að keyra í skóginn ef við þurfum á honum að halda, eða hvað sem hann getur dugað í annað. Hinn er ætlaður undir útieldhúsið, þ.e. allt sem tilheyrir því.

Hin gönguferðin var farin til að skoða framkvæmdirnar við mokstur grunnsins fyrir nýja skólann. Það var mikið og merkilegt sem bar þar fyrir augu. Enduðum við síðan í frjálsum leik í brekkunni við leikskóladeildina þar sem við heyrðum meðal annars af álfkonunni með börnin sjö sem býr í stóra steininum í brekkunni.

Íþróttirnar færðust út nú í maí og var farið út á tjaldsvæði í ýmsa leiki! Rauði kisuhópur notaði síðasta íþróttatíma til að ganga hringinn í kringum skóginn við tjaldsvæðið, þar fundum við svartan ruslapoka sem kom að góðu gagni því við náðum að fylla hann í göngunni.

Nú 15. maí lauk hópastarfi vetrarins svo við munum leika okkur enn meira frjálst, úti sem inni.

Að lokum minnum við á myndadálkinn á forsíðu heimasíðunnar en þar erum við dugleg að setja inn nýjar myndir  

Nemendur mæta með foreldrum sínum í samtal hjá umsjónarkennara.

Í námsmatsmöppunum eru vorsamtalsblöð sem nemendur og foreldrar eiga að

fylla út heima og skila í samtölunum.  Þar leggja nemendur mat á ýmsa þætti skólastarfsins og geta komið athugasemdum á framfæri.  Jafnframt er þetta gott tækifæri fyrir nemendur að segja foreldrum sínum frá námi sínu í skólanum.

Foreldrar eru beðnir um að gefa sér góðan tíma til að skoða námsmatsmöppurnar með börnunum sínum áður en samtölin fara fram. Skoðið vel félagslegu markmiðin með tilliti til Vörðu nemandans. Félagslegu markmiðin eru metin eftir því hvernig hefur gengið að vinna að markmiðum sem koma þar fram.

Ætlaðar eru 15 mínútur í hvert samtal og er nauðsynlegt að fylgja þeim tímamörkum svo skipulag raskist ekki. Sjá tímasetningar á samtölunum hér. Munið að koma með námsmatsmöppurnar í viðtölin.

Tveir starfsmenn óskast við Kerhólsskóla frá og með næsta skólaári. 

Leikskólakennari eða þroskaþjálfi, 80 – 100% starfshlutfall

Umsækjendur þurfa að hafa leikskólakennaramenntun og/eða menntun sem þroskaþjálfi. Fáist ekki sérmenntaðir starfsmenn verður ráðinn inn starfsmaður  í stöðu leiðbeinanda.

Íþróttakennari, 50 – 70% starfshlutfall

Umsækjendur þurfa að hafa góða samskiptahæfileika, sjálfstæði í vinnubrögðum, jákvæðni, samviskusemi og hafa ánægju af að vinna með börnum.

Kerhólsskóli er staðsettur að Borg í Grímsnesi. Skólinn leggur áherslur á einstaklingsmiðað nám, umhverfismennt- og náttúrufræði, útikennslu, list- og verkgreinar.

Umsóknir með upplýsingum um menntun, starfsreynslu og umsagnaraðila berist til skólastjóra ekki síðar en miðvikudaginn 15. maí nk.

Nánari upplýsingar gefur Hilmar Björgvinssonskólastjóri í síma 482-2617 og 863-0463, netfang hilmar@kerholsskoli.is . Heimasíða: http://www.kerholsskoli.is .

Mikið var um að vera á mánudaginn síðast liðinn en þá var stöðvadagur í Kerhólsskóla. Nemendum var skipt á 3-4 stöðvar þvert á aldur, allt frá tveim eldri hópum leikskóladeildar og upp í 8. bekk.

Þær stöðvar sem voru í boði voru:

1. Skógarstöð

2. Gott og gaman

3. Málað á tré í leikskóladeild

4. Fánastöð.

Á skógarstöðinni var skógurinn í kringum grunnskóladeildina grisjaður og snyrtur ásamt því að nemendur fengu að tálga spítur. Þeirri stöð slepptu nemendur leikskóladeildar.

Á stöðinni “Gott og gaman” var spunaverk unnið í minni hópum og sýndu nemendur það hvor öðrum að lokinni æfingu. Því næst gæddu nemendur og kennarar sér á lummum sem bakaðar voru yfir eldi við skýlið.

Málað var á tvenns konar tré í leikskóladeildinni og með tvenns konar málningu. Annars vegar var um skífur sem sagaðar höfðu verið úr jólatrjánum okkar að ræða og hins vegar mótatimbur, gróft og skemmtilegt . Málningin sem var í boði var akrílmálning og vatnslitir.

Á fánastöðinni var unnið að fánunum sem prýða eiga útilistaverkið sem allir eru að vinna að saman ásamt listamanninum Halldóri Ásgeirssyni. Leikskólanemendur fengu reyndar aðeins sérsniðið verkefni þar en þau máluðu með þekjulitum á maskínupappír. 

Dagurinn var mjög skemmtilegur í alla staði og hlökkum við til næsta stöðvadags sem haldinn verður að ári liðnu.

Til hamingju íbúar Grímsnes- og Grafningshrepps.

Kerhólsskóli í Grímsnes- og Grafningshreppi auglýsir eftir nýjum umsóknum um skólavist fyrir næsta skólaár.

Leikskóladeild

Rétt til skólavistar á leikskóladeild hafa öll börn frá 12 mánaða aldri sem eiga lögheimili í Grímsnes- og Grafningshreppi.

Grunnskóladeild

Í grunnskóladeild Kerhólsskóla eru nemendur frá 1. – 8. bekk. Nemendur í 9.-10. bekk sækja skóla í Grunnskóla Bláskógabyggðar í Reykholti samkvæmt samningi á milli sveitarfélaganna.

Umsóknir

Foreldrar/forráðamenn þeirra barna sem hefja skólagöngu næsta haust eru vinsamlegast beðnir um að sækja um skólavist fyrir þau sem allra fyrst eða fyrir 14. maí. Foreldrar sem hyggjast fá leikskóladvöl fyrir börn sín síðar á skólaárinu eru jafnframt hvattir til að sækja um sem fyrst.

Umsóknareyðublöð um skólavist má finna á heimasíðu skólans; http://www.kerholsskoli.is undir flipanum; Eyðublöð > Kerhólsskóli. Einnig má nálgast þau á skrifstofu skólans sem og á skrifstofu sveitarfélagsins.  

Nánari upplýsingar er hægt að fá hjá Hilmari Björgvinssyni skólastjóra í síma 482 2617 / 863 0463 eða með því að senda tölvupóst á netfangið hilmar@kerholsskoli.is

Skólastjóri

Einnig viljum við benda á að nýjar myndir eru komnar inn á síðuna undir myndaflipanum okkar.